Просмотров: 583
Елімізге әйгілі экономика ғылымдарының докторы, профессор Қазақ АӨК экономикасы және ауылдық аумақтарды дамыту ҒЗИ төрағасы Базархан Рүстембаевтың мезгілсіз өмірден өтуіне орай, марқұмның отбасының ауыр қайғысына ортақтасып, С.Сейфуллин атындағы ҚазАТЗУ ұжымы атынан көңіл айтамын.
Базархан Рүстембаев Бауыржан Момышұлы туған топырағынан түлеп, еңбек жолын өзі бітірген Қазақ ауыл шаруашылығы институтының комсомол комитетінің хатшысы болып бастап, 1982-2005 жылдары білім саласында ғылыми-оқытушылық жолында, басшылық орындарында жұмыс істеді. 2005 жылы С.Сейфуллин атындағы Қазақ агротехникалық университеті технологиялық үрдістерді механикаландыру кафедрасының меңгерушісі қызметін атқарды. 2006 жылы ғылыми жұмыстар және халықаралық байланыстар жөніндегі проректор қызметіне тағайындалып, докторлық диссертация кеңесінің төрағасы, кеңестің мүшесі болды. 2008 жылы профессор, ал 2010 жылы халықаралық аграрлық білім беру академиясының академигі атағына ие болып, осы жылы білім беру саласындағы ерекше еңбегі үшін ҚР Білім және ғылым министрінің «ҚР ғылымын дамытуға сіңірген еңбегі үшін» куәлігімен марапатталды. 27 жылдан астам ғылыми-педагогикалық оқытушылық қызметін атқара отырып, 100-ден астам ғылыми еңбек, 5 патент алды. Ауыл шаруашылық мамандарын даярлауға мол үлесін қосқан айтулы ғалымның мейірбан мінезі мен жарқын бейнесі әріптестерінің жадында мәңгі қалары анық.
Қамшының сабындай ғұмырында өмірін ғылымға арнаудың, ұйымдастырушылық іскерлік пен ұстаздықты шебер ұштастырудың ерекше үлгісін көрсеткен жанның өнегелі жолын тәлімін алған шәкірттері жалғастыра береріне сенеміз.
Марқұмның қабірін пейіштің нұрына бөлеп, жаны жәннатта болсын. Отбасы, тума-туыстарына қайғырып көңіл білдіремін.
С.Сейфуллин атындағы ҚазАТЗУ Басқарма төрағасы-Ректоры,
ҚР ҰҒА академигі Қ.М.Тіреуов
