Просмотров: 730
Университеттің жеті түлегіне 2022–2026 жылдар аралығында Мәдени-бұқаралық жұмыс департаментінің Өнер және шығармашылық орталығында шығармашылық даярлық курсынан өткенін растайтын сертификаттар табысталды.
Төрт жыл бойы студенттер негізгі білім беру бағдарламасы бойынша оқуын шығармашылық дайындықпен, жүйелі репетициялармен, концерттік тәжірибемен және университеттің, қаланың әрі республиканың мәдени жобаларына белсенді қатысумен қатар алып жүрді.
«Бүгінде студент университетке тек диплом алу үшін ғана келмейді. Біздің міндетіміз – болашақ инженердің, агрономның, ветеринардың немесе сәулетшінің өз мамандығымен қатар шығармашылық әлеуетін дамытуына және қосымша кәсіби құзыреттерді меңгеруіне мүмкіндік беретін орта қалыптастыру. Бұл сертификаттар – түлектеріміздің төрт жылдық табанды еңбегінің нақты нәтижесі», – деді Мәдени-бұқаралық жұмыс департаментінің директоры Бахыт Тәжінов.
Биыл сертификаттарға Әмірхан Елдар, Төлегенова Гүлназ, Сағатбек Серікбек, Ибрагимұлы Дінмұхаммед, Өтепберген Аяулым, Мелден Нұржігіт және Хойтан Ақбота ие болды. Олар университеттің төрт институтының – Ауыл және орман шаруашылығы институтының, Инжиниринг және азық-түлік технологиялары институтының, Жануарлар ғылымы және ветеринария институтының, сондай-ақ Жер ресурстары және сәулет институтының студенттері.
Сахналық тәжірибе студенттердің көпшілік алдында сөйлеу, командамен жұмыс істеу, тәртіпті сақтау, тиімді коммуникация орнату және өзін-өзі таныстыру дағдыларын қалыптастырады. Бұл – бүгінгі күні таңдаған мамандығына қарамастан, кез келген жас маман үшін аса маңызды құзыреттер.
Университет түлектері оқу орнын тек білікті маман ретінде ғана емес, шығармашылық тәжірибемен де байып шығады. Бұл тәжірибе олардың тұлғалық қалыптасуы мен кәсіби дамуының ажырамас бөлігіне айналады.
Бір ғана мамандық – мүмкіндіктің шегі емес. Студент өз әлеуетін дамытуға ұмтылса, университет оған әлдеқайда кең мүмкіндіктер ұсына алады.
