Просмотров: 428
Жеңіс күні қарсаңында елордада жоғары оқу орындарының студенттері арасында дәстүрлі жеңіл атлетикадан эстафета өтті. Ауқымды спорттық іс-шараға жоғары оқу орындарының студенттері, колледж және мектеп оқушылары қатысып, жүздеген жас спортшының басын қосты.
Жарысты Дене шынықтыру және спорт басқармасы ұйымдастырды. Қатысушылар үшін жалпы ұзындығы 2,4 шақырымды құрайтын, 14 кезеңге бөлінген арнайы қашықтық дайындалды. Әр кезең спортшылардан жоғары жылдамдық пен төзімділікті ғана емес, эстафеталық таяқшаны дәл әрі үйлесімді тапсыруды талап етті.
С. Сейфуллин атындағы Қазақ агротехникалық зерттеу университетінің командасы КСРО спорт шебері Ф.А. Батыровтың жетекшілігімен университет намысын абыроймен қорғап, бірінші орынды жеңіп алды. Спортшылар жоғары физикалық дайындықтарын, ұйымшылдығын және жеңіске деген жігерін көрсетті.
Жарыстың алғашқы кезеңдерінен-ақ ҚАТЗУ командасы көшбасшылар қатарынан көрініп, қарқынын біртіндеп арттыра түсті. Әр қатысушы ортақ нәтижеге өз үлесін қосып, жауапкершілік, табандылық және жеңіске деген ұмтылыс танытты. Қорытынды кезеңдерде университет спортшылары басымдықты сақтап, мәреге бірінші болып жетті.
Бұл жеңіс – тынымсыз жаттығудың, тәртіптің және мықты командалық рухтың нәтижесі. Команданың жетістігіне дене тәрбиесі кафедрасының оқытушылары мен жаттықтырушылары Н.Б. Мамиев, Г.Т. Рожко, Х.Б. Төленова, Б.К. Қанапиянов және Ж.Б. Жанбосынова үлкен үлес қосты.
Жеңіс күніне арналған эстафетадағы бұл жеңістің маңызы ерекше. Бұл тек спорттық жетістік қана емес, бейбітшілік пен еркіндікті қорғаған батырлардың ерлігіне деген құрметтің белгісі. Өз өнерлерімен студенттер жас ұрпақтың ел тарихын құрметтейтінін және ерлік, төзімділік пен бірлік дәстүрін жалғастырып келе жатқанын көрсетті.
Университет командасын лайықты жеңісімен құттықтаймыз және алдағы жарыстарда жаңа жетістіктер тілейміз!
