Просмотров: 1044
С. Сейфуллин атындағы Қазақ агротехникалық зерттеу университетінің М. А. Гендельман атындағы залында Атырау облысы Құрманғазы ауданының еңбеккерлерімен кездесу өтті. Іс-шара Мемлекет Басшысы Қасым-Жомарт Тоқаев жариялаған Жұмысшы кәсіптер жылы шеңберінде өтті және еңбек кәсіптерін қолдау мен дамытудың, сондай-ақ өңірлер мен білім беру мекемелері арасында тәжірибе алмасудың жарқын үлгісі болды.
Жүздесудің шымылдығы Атырау облысы Құрманғазы ауданымен көпшілікті таныстырған презентациялық роликпен ашылды.
Кездесуді ҚазАТЗУ Басқарма төрағасы-Ректоры, ҚР ҰҒА академигі Қ.М.Тіреуов кіріспе сөзбен ашты. Ол бүгінгі іс-шара жұмысшы мамандықтарын және Қазақстанның тұрақты дамуын қамтамасыз етудегі еңбек ұжымдарының маңыздылығын насихаттауға бағытталғанын атап өтті.
-"Жұмысшы мамандықтар жылы жұмысшы мамандықтардың мәртебесін көтерудегі және еңбекті қоғамның табысты дамуының маңызды элементі ретінде танудағы маңызды қадам болып табылады", — деп атап өтті Қ.М. Тіреуов.
Құрманғазы ауданынан келген делегация құрамына аудан әкімі А. С. Жанғалиев, аудан әкімінің орынбасары А. Х. Мұратов, аудандық мәслихат төрағасы Г. Г. Қалиева, өлкетанушы және "Құрманғазы" ет өңдеу кәсіпорнының директоры Б. А. Кенжебаев, Қазақстан Жазушылар Одағының мүшесі, өлкетанушы және Халықаралық "Алаш" сыйлығының лауреаты Ө.Қажымғалиев, сондай-ақ белгілі мәдениет және өнер саласының өкілдері болды. Делегация қатысушылары университетпен танысып, білім, ғылым және мәдениет саласындағы ынтымақтастықты дамыту мүмкіндіктерін талқылады.
Кездесудің негізгі бөлігі Құрманғазы өңірінің жетістіктерімен бөліскен аудан өкілдерінің ортаға шығып сөйлеуінен тұрды. Аудан әкімі А. С. Жанғалиев өңірдің әлеуметтік-экономикалық дамуы туралы айтып, ауданның өркендеуі үшін еңбек ұжымдарының маңыздылығына назар аударды. Ет өңдеу кәсіпорнының директоры Б. А. Кенжебаев университет студенттері мен оқытушыларына табысқа жету жолы туралы айтып, мамандық таңдаудағы жеке тәжірибесімен бөлісті.
Ауданның мәдени және тарихи мұрасына ерекше назар аударылды. Өлкетанушы және Халықаралық "Алаш" сыйлығының лауреаты Өмірзақ Қажымғалиұлы Құрманғазы ауданы мақтан тұтатын тұлғалар туралы, сондай-ақ осы өңірдің Қазақстан үшін географиялық және әлеуметтік-мәдени маңызы туралы айтып берді. Кездесу аясында қонақтар университетке жергілікті жазушылар мен ақындардың кітаптарын, ауданының 3 томдық энциклопедиясын, Құрманғазы ауданының көркем табиғатын бейнелейтін картинаны табыс етті.
Салтанатты жиынның қорытындысында мемлекет қайраткері және университетке аты берілген С.Сейфуллиннің 130 жылдығына орай университет шығарған "Сәкен Сейфуллин" медалін табыстау болды. Медальдар Құрманғазы ауданының әкімі А.С. Жанғалиевке, жергілікті жазушы және өлкетанушы Ө. Қажымғалиевке, ет өңдеу кәсіпорнының директоры Б. А. Кенжебаевқа және өндірістік кооператив төрағасы С. Қ. Сұлтановқа өңірдің дамуына қосқан үлесі және университетпен ынтымақтастықты нығайтуға жәрдемдескені үшін табысталды.
Кездесу соңында Құрманғазы ауданының әртістері дайындаған көркемөнерпаздар концерті өтті. Концерт университет пен аймақ арасындағы мәдени ынтымақтастыққа баса назар аудара отырып, іс-шараның жарқын көрінісі болды.
Осылайша, бұл кездесу білім беру мекемелері мен өңірлер арасындағы байланыстарды нығайтудағы, еңбек ұжымдарын қолдаудағы және жұмысшы кәсіптер жылына қойылған мақсаттарға сәйкес келетін жұмысшы кәсіптерін танымал етудегі маңызды қадам болды.
