"Отандастар" қоры өкілдерінің тарихи Отаны – Қазақстанға келген және білім алып жатқан студенттермен кездесуі С.Сейфуллин атындағы Қазақ агротехникалық университетінде өтті.
Қордың ресми өкілі Нұржан Жұмағалиев тарихи отанына оралуға тілек білдірген отандастарға қордың қолдауы туралы айтты. Студент жастарға алдағы уақытта Қазақстанда қалған жағдайда азаматтық алу жолдарының мән-жайын кезең-кезеңімен түсіндірді.
Жақында Қор жанынан түрлі жобаларды, соның ішінде білім беру жобаларын қолдаумен айналысатын "Жас қазақ" халықаралық жастар ұйымы құрылды. Мысалы, стипендиялық бағдарламаға құжаттар тапсыруға, сондай-ақ ҚР-да магистратура бойынша білім алуға болады.
Жастар саясаты департаментінің директоры Әділет Ахметов оқу ордамыздың атынан "Отандастар" қорына алғысын білдіріп, ұсынылған жобаларды жүзеге асыруға университет тарапынан қолдау көрсететіндігін жеткізді.
