Просмотров: 36
14 қыркүйекте Қазақстан Республикасының Президенті Қасым-Жомарт Тоқаевтың Корея Республикасына мемлекеттік сапары аясында және «Орталық Азия – Корея Республикасы» бірінші саммиті қарсаңында Ұлттық аграрлық ғылыми-білім беру орталығына қарасты С.Сейфуллин атындағы Қазақ агротехникалық зерттеу университетінің делегациясы Чонбук ұлттық университетіне (Jeonbuk National University, JBNU) арнайы ат басын бұрды.
ҚАТЗУ делегациясын Басқарма төрағасы – Ректор Қанат Тіреуов бастап барды. Университет басшылығымен және JBNU Халықаралық қатынастар басқармасының өкілдерімен өткен кездесу барысында тараптар білім беру, ғылым және академиялық ұтқырлық салаларындағы ынтымақтастықты дамыту перспективаларын талқылады.
Сапардың басты нәтижесі білім алушылардың академиялық ұтқырлығы туралы келісімге қол қою болды. Құжат екі университет студенттеріне академиялық алмасу бағдарламалары бойынша білім алуға, білім беру және ғылыми бастамаларға қатысуға, сондай-ақ халықаралық академиялық тәжірибе жинақтауға жаңа мүмкіндіктер береді.
Тараптар бірлескен білім беру және ғылыми-зерттеу жобаларын жүзеге асыруға, студенттер мен оқытушылар алмасуын кеңейтуге, сондай-ақ екі университеттің факультеттері арасында тікелей байланыстар орнатуға ерекше назар аударды.
Сапар аясында делегация JBNU-дың заманауи инфрақұрылымымен, оның ішінде Орталық кітапханамен, Хан Сын Вон кітапханасымен, AI SPACE және Sky Lounge кеңістіктерімен танысты.
Қол қойылған келісім академиялық ұтқырлықты кеңейтуге және ҚАТЗУ мен Чонбук ұлттық университеті арасындағы ұзақмерзімді серіктестікті нығайтуға практикалық негіз болып, Қазақстан мен Корея Республикасы арасындағы білім беру және ғылыми байланыстардың дамуына ықпал ететін болады.
