Құрметті Эльмира!
Сұрағыңыз орынды. «Ветеринарлық медицина» мамандығы бойынша 2018 оқу жылына бөлінген мемлекеттік гранттың саны 122 адам, ал ақылы негізде 28 адам алынып, барлығы университеттің жоспарына сай 150 адамды құрап отыр. Осыған орай, бұл мамандыққа артық қабылдай алмаймыз.
Ал, 5В080200 - «Мал шаруашылығы өнімдерін өндіру технологиясы» мамандығы «Ветеринарлық медицина» мамандығымен тығыз байланысы бар, бүгінгі күні елімізде сұранысқа ие мамандықтардың бірі. Аталмыш мамандық түлектеріне «Ауыл шаруашылығы бакалавры» академиялық дәрежесі беріледі. Бұрынғы Кеңес одағы кезінде бұл мамандық «Зоотехния» деп атлды. Қазіргі кезде заман талабына орай малды өсіріп қана қоймай, олардан алынатын шикізат өнімдерін (сүт, ет, тері, жүн және жұмыртқа т.б.) өндіру және өңдеу технологиясын қоса меңгерген білікті «Мал шаруашылығы өнімін өндіру технологиясы» деген атаумен мамандар даярлануда. Мамандық түлектерінің жұмысқа орналастырылуы 89,3% құрайды, олар әртүрлі қызмет салаларында қымзет етеді: білім, ғылым, мемлекеттік қызмет, бизнес және т.б.
Аталмыш мамандық бойынша бітірген түлектердің мамандық қызмет орындары келесідей: меншіктің әртүрлі формаларының ауыл шаруашылығы кәсіпорындары; етті-сүтті өңдейтін кәсіпорындар; құс фабрикалары; өнім сапасын анықтайтын зертханалар; ғылыми-зерттеу институттары; селекциялық-асылтұқымдық орталықтар, Республикалық тұқым палатылары және асылтұқымды шаруашылықтар; ҚР АШМ мал шаруашылығы департаменті, аудандық және облыстық а/ш басқармалары және т.б.
Бакалавр академиялық дәрежесін алғаннан кейін, бітірушілердің магистратурада оқуды жалғастырып, магистр дәрежесін алуға мүмкіндіктері бар, бұл мемлекеттік қызмет жүйесінде жұмыс істеуге, оқытушылық және ғылыми қызметпен айналысуға мүмкіндік береді, сонымен бірге докторантурада оқуды жалғастырып, диссертация қорғап, философия докторы (Phd ) дәрежесін алу мүмкіндігі де бар.
5В080200 – «Мал шаруашылығы өнімін өндіру технологиясы» мамандығы бойынша бакалаврлары университетімізде 50 жылдың үстінде тарихы бар «Мал шаруашылығы өнімін өндіру және өңдеу технологиясы» кафедрасының біліктілігі жоғары профессорлық-оқытушылар құрамымен дайындалады. Кафедраның ғылыми әлеуеті 84,2% құрайды.
Кафедрада малдың асылтұқымды қасиеттерін, өндіріс технологиясын жетілдіру және мал шаруашылығы өнімдері сапасын жоғарылату мақсатында Мемлекеттік гранттық және мақсаттық бағдарламалары аясында ғылыми зерттеулер жүргізілуде. Кафедра халық шаруашылығының барлық салаларында, оның ішінде аудан, облыс, ірі және шағын мекемелердің (шаруашылықтардың) басшылары болып қызмет атқаратын 10,5 мың қызметкер дайындады.
Сондықтан Эльмира, балаңыз осы мамандық иесі болса да, сұранысқа ие білікті маман болады деген сенімдеміз. Біздің С.Сейфуллин атындағы университетіне қош келдіңіз!
